ANG SIMBAHAN NG PATEROS

Ang Simbahan ng Pateros ay itinatag ng mga Agustinong Pari bilang Visita ng Pasig taong 1572 at ito ay naging Parokya sa Pamamatnubay ni San Roque noong ika-1 Hunyo taong 1815. Ito ay ipinatayo nina Padre Andres Veil at Padre Manuel Pelaes mula sa disenyong bato sa pagkakalikha ni Padre Gomez Marañon.

Ipinagawa naman ni Padre Raymundo Martinez ang kampanang ipinangalan kay San Isidro Labrador taong 1821. Nasira ito noon ng lindol taong 1863 at ipinaayos ni Padre Nicolals Gonzales taong 1892. Natapos ang pagsasaayos ng simbahan noong 1893, sa taon ng pamumuno ni Padre Tomas Espejo.

Naging saksi ang simbahan sa noo’y Rebolusyon ng Pilipinas laban sa mga mananakop na Kastila at naging pansamantalang kwartel ni Heneral Emilio noong ika 1-2 ng Enero taong 1897. Muling nasira ang simbahan noong ika-14 ng Marso taong 1899 sa kalagitnaan ng labanan ng mga tiga-Pateros at mga Kastila.

Sa panahon ng ikalawang digmaang pandaigdig, naging saksi ang Parokya ni San Roque sa pagitan ng labanan ng mga Pilipinong Katipunero at Hukbo ng mga Hapon. Labis ang hapis ng mga pamilya ng mga sibilyang dinakip at dinala sa simbahan na noo’y ginawang kulungan sa utos ng mga Hapon. At noong Disyembre taong 1944, pinaslang ang maraming sibilyan ng mga Hapon; isang malagim na pangyayari na naganap mismo sa loob ng simbahan.

Matapos ang ikalawang digmaang pandaigdig ay muling bumangon ang mamamayan ng Pateros gayundin ang simbahan nito.

Mula sa kinabibilangan nito sa Archdiyosesis ng Maynila, ito ay napasailalim sa Diyosesis ng Pasig dahil sa pagkakatatag nito noong Agosto 21, 2003.

Taong 2009, sa masidhing debosyon at panalangin ng mananamapalatayang tiga-Pateros, ang ating Parokya ay iniluklok bilang Dambanang Pandiyosesis ni Santa Marta ang ating Pintakasi at Rosas ng Pateros. Ito ay sa pamumuno ng unang Rektor ng Dambana at Kura Paro Reb. Padre Orlando B. Cantillon

Nito lamang 2015 sa Pamumuno ng ating ikalawang Rektor ng Dambana at Kura Paroko Reb. Padre Roy M. Rosales ay ipinagdiwang ng Parokya ni San Roque ang ika-200 pagkakatatag nito bilang isang Parokya. Ito ang pasasalamat ng mananampalataya sa biyayang ipinagkaloob sa nagdaang 200 daang taon at sa mga taong darating pa.

Sa kasalukuyan, ang ating simbahan ay pinamumunuan ng ating ngayo’y Rektor ng Dambana at Kura Paroko Reb. Padre Loreto "Jhun" Sanchez, Jr. Ang bawat pagkilos ng organisasyon ay nakapaloob sa 'vision' at misyon ng ating Parokya:

VISION

Pinapangako namin ang maging isang pamayanan na mga alagad ni Kristo na hinuhubog ng Espiritu Santo tungo sa pagpapalaganap ng kaharian ng Diyos sa pagkakandili ng Birheng Maria at ng Mahal na Patrong San Roque at Santa Marta.

MISSION

1. Ang kahalagahan ng pagpapahayag ng Salita ng Diyos at ang pagdiriwang ng Sakramento sa pagkakaisa ng pamayanan;

2. Ang tuloy-tuloy at ganap na paghuhubog sa pananampalataya sa lahat ng pamunuan at kasapi ng mga pamayanan;

3. Ang pagpapalaganap ng malalim na pagkakapatiran, pananagutan at pagmamalasakitan upang maging simbahan ng mga dukha;

4. Ang pagbabatid ng mga lingkuran ng simbahan, pari at layko sa sitwasyon at buhay pamayanan;

5. Ang pagbibigay prioridad sa pagtatag at pangangalaga ng mga Parish Pastoral Units (PPU’s);

6. Ang pagpapahalaga sa partisipasyon ng mga kabataan sa simbahan;

7. Ang pangangalaga sa dignidad ng pamilya at pagpapalaganap din ng apostolado ng pamilya;

8. Ang pagpapahalaga sa ating kapaligiran, kalikasan at ekolohiya.